ASEKKAK

​

Yiwen ma yuḥwaǧ-ik
Yal ass ad k-itezzi
Ad d-yessuden afus-ik
Ad k-yettεassa di yal tizi
Ad as-yeεǧeb yiman-ik
Ad isell i wawal-ik
Ad iḥemmel imeslayen-ik
Ad ak-yeqqar : zizi

Yal ass ad k-d-issawal
Amek akk i tetteliḍ ?
Am gma-k ad yuɣal
Liḥala-s ad k-tɣiḍ
Ad as-tefkeḍ azal
Nnig n wayen yuklal
Ad as-tefkeḍ axellal
Ma yenɣa-t usemmiḍ

Yal ass ad d-yesteqsay
Akken ad tefɣem di sin
S taḍsa ad k-d-yettmeslay
Ul-is yeččur d tismin
Deg wawal ad yessafay
Di ccan-ik ad yessalay
Sdat-k ad yettleɣway
Akken ul-ik ad d-yiḥnin

Mi dayen yeqḍa ccɣel-is
Am tata ad ibeddel
Ad yeεreq fell-ak udem-is
Anda k-iwala ad yerwel
Ad ibeddel ula d tikli-s
Ad yernu tamuɣli-s
Ad k-yemḥu di ddunit-is
S tsussmi-s ad k-icewwel

Asmi ara ibeddel fell-ak
Ur tettamneḍ ara iman-ik
Winna yezgan ar tama-k
Ass-a yuɣal d aεdaw-ik
Winna i tenwiḍ d asellak
Ad yali azzuḥ fell-ak
Ad yenker seg uẓar ayla-k
D awezɣi ad d-yebder isem-ik

Ma tnudaḍ fell-as aḥlil
Ar ɣur-k ur d-itezzi
Deg yisurifen ad yettektil
Ad k-yakel am yizi
Di ccɣel-is ad yettkemmil
Ad k-d-yezwir s yiɣil
Ur tettafeḍ ara ttawil
Tadukli-nwen ad tiεezzi