TAYRI-M

 

Yak teẓriḍ ḥemmleɣ-kem
D kemm ay d leεmer-iw
Ma yella ulac-ikem
Yezga yerwi wallaɣ-iw

Deg wasmi lliɣ d amecṭuḥ
Qarreɣ-as anda-kem ?
Serḥeɣ-as i wul iruḥ
Iruḥ-n qbala ar ɣur-m

Ḥemmleɣ-kem teεǧbeḍ-iyi
Mebla ccek d ukukru
Bɣiɣ-kem tebɣiḍ-iyi
Deg wass-nni amezwaru

Mazal-iyi ḥemmleɣ-kem
Mazal ad kem-ḥemmleɣ
D awezɣi ad beddleɣ udem
D awezɣi ad kem-beddleɣ

Ayen ttnadiɣ, ufiɣ-t
Tayri, leḥnana d leεqel
Lqedd d zzin n teqbaylit
Yal ass yettzid uḥemmel

Nudaɣ-d akk timizar
Walaɣ akk tijeǧǧigin
Ɛeddeɣ timdinin, d tuddar
Walaɣ akk tiqcicin

Ur d-ufiɣ tinna i kem-yecban
Zzin-im ijebbed allen
Ferḥeɣ nekk i kem-yesεan
Ussan-iw d iẓidanen

Yak teẓriḍ ḥemmleɣ-kem
Ḥemmleɣ-kem seg wul yeṣfan
A tamelḥant n wudem
Kemm-i d ajeǧǧig yefsan

Mi beεdeɣ fell-am xaqeɣ
Ussan-iw d iɣezfanen
Ma ur kem-walaɣ tqelqeɣ
Ttḥiriɣ ad kem-ẓrent wallen

Mi ara d-kecmeɣ ar wuxxam
Ɛeggu i tekkes-iyi
Ad iyi-d-temmagreḍ s taḍsa-m
Taḍsa-m yeččuren d tayri

Yak teẓriḍ-iyi ḥemmleɣ-kem
Ḥemmleɣ-kem aṭas, aṭas
Ulac tayeḍ nnig-m
A kemm yifen akk tullas