TIMERJA

​​

Mi walaɣ deg wallen-im
Sser yeffer zzin-im
Yettuɣal-iyi-d usirem
Ddunit-iw akk, d kemm

D tafat n wussan-iw
Yeḍwan abrid-iw
Ul-iw izehhu yiss-m
Ulac tayeḍ nnig-m

Afrayen-iw unagen
Deg yirebbi-m rrsen
Iẓri-w ma ulac-ikem
Yettru, yugi ad yessusem

Ul-iw mi ara d-yijjiq
Tettkseḍ-as lxiq,
D kemm kan i yegzan
Ayen i as-xedmen wussan

Mi ara iliɣ yid-m
Ddunit akk tessusem
Am wakken yiwen ur yelli
Akud yaḥbes tikli

Sdaxel n wul-iw amsari
Ggiɣ-as amkan i tayri
D imɣi, yeččuren d leḥnana
Yemɣi d aɣezfan yegma
Yeswa s tayri-m yefsa
Akal deg-i temɣi d tasa

Ass-a, mazal-it yeffud
Timarja terẓa-as afud
Yeffud aṭas udem-im
Sellaw yuyes tisin-im
Afrayen-iw cudden ɣer ɣur-m
Urzeɣ-ten deg wul, s usirem

Imeslayen i am-d-nniɣ
Deg wul-iw i ten-ǧǧiɣ
Ar din iɛelleq ssber-iw
Tḥenniceɣ ad kem-ẓrent wallen-iw
Ssawaleɣ-am-in tesɛuzgeḍ
Tiɣri-w tugiḍ ad as-d-terreḍ

Ttnadiɣ-kem yal ass,
Ttraǧuɣ-kem ad d-taseḍ yiwwas
Ugadeɣ ur d-tettuɣaleḍ ara
Ugadeɣ ur kem-ẓarreɣ ara
Ugadeɣ tara-w ad tegzem
Beṭṭu, ad yerẓ asirem

Mazal tayri-m tedder deg-i
Mazal iẓri-w ineggi
S imeṭṭi-w imɣan-is sswan
Temɣi tefka iẓuran,
Afrayen-iw ttnadin-kem
Tafekka-w tebɣa-kem

Di tuggdi yessawalen i layas
Ugadeɣ ad iyi-d-tḥuddeḍ tilas
Ugadeɣ ad aɣ-ssedhun wussan
Ugadeɣ ad aɣ-ikellex zzman
Ugadeɣ zzher-iw ad yefk afus
Waḥd-i ad mmteɣ d ameḥbus