ASḤISSEF

 

S kra n win mi mliɣ tawwurt
Yeddem-d ar ɣur-i Tafruyt
Si tmacahut ar tmacahut
Yuker-iyi tasarut
Iruḥ yezwar yekcem
Yeǧǧa-d ul-iw iqeccem

Yettel yiles, imi yessusem
Ugadeɣ ad d-yarew ssem
Acḥal-aya yeggugem
Deg urfan i d-yettagem

Yugi ad d-yessufeɣ awal
Yettḥezzib, ireggel i ccwal
Ccwal d imerẓi n yal ass
Mmɣin, ẓẓaẓayen tilas

Ay ixef-iw, anwa i k-d-yesɣamen ?
D wid akken numen
Wwten-aɣ-d s deffir
S wudɣaɣ uffir

Ay ul-iw, anwa i aɣ-ijerḥen ?
S tiyita qessiḥen
D wid akken nḥemmel
Abrid asmi i asen-t-nemmel

Ay abrid-iw, anwa i k-iregglen ?
D win iwumi ldiɣ allen
Yemɣi deg wul-is ddɣel
Yusem yebɣa ad iyi-isderɣel
Yenwa ad iyi-teǧǧ tallit
Tagara ɛawdeɣ-d talalit

Win yettakren s laman
Yiwwas ad t-awin waman
Ayen akk yezrin , yezri
Wwiɣ s teɣzi, s tehri
Tura ad ssifeɣ wid sneɣ
Ur mazal ara ad t-amneɣ

Siḥ ay iẓri-w siḥ
Allen ur walant iqiḥ
Fiḥel imeṭṭi, tettel tyersi
Tekres tegumma ad tefsi

Taftilt i d-yessaɣ usirem
Tafat-is truḥ tenuddem
Aḍar-iw yewwi aḥdid
Allen-iw ttnadint abrid

Ay aḍar melmi ara naweḍ ?
Neɣ ahat ur nettaweḍ
Wid akk iwumi afus
Fkan deg-i afus

Ay allaɣ-iw qqim yid-i
Ur d iyi-ttaǧǧa waḥd-i
Ur ttaǧǧa afrayen-iw
Ad ǧǧen imeslayen-iw

Qqim yid-i ttxilek
Akken ad iliɣ d nekk
Ma ulac ad d-iniɣ leɛǧeb
Ungif ad iyi-d-iwaǧeb

Ugadeɣ ay allaɣ-iw ad ttruḥeḍ
Ul-iw ad t-jerḥeḍ
Imi-w ad d-yesseɣres snasel
Aɛeẓẓug ad iyi-d-yessel