ASTEQSI-W

 

Uliɣ s igenwan
Nwiɣ a kem-afeɣ
Steqseɣ itran
Gar-asen ur kem-walaɣ
Steqseɣ tiziri
Ma tecfa ɣef tayri
Steqseɣ asigna
Ulac d acu iyi-d-yenna

Steqseɣ anebdu
Yessulin tifesniwin
Asmi kken nteddu
Ɣef yidis n teftisin
Steqseɣ lmuja
Ma tecfa acḥal nerja
Steqseɣ idɣaɣen
D waman imi ttnaɣen

Steqseɣ tafsut
Mi neglalez deg yijeǧǧigen
Steqseɣ tafukt
I yaɣ-d-yettmuqulen
Steqseɣ iberdan
Steqseɣ wid iɛeddan
Steqseɣ targit
Tenna-d : « Kker d taṣebḥit »

Steqseɣ ccetwa
D waḍu mi yerfa
Steqseɣ lehwa
Ma mazal tecfa ?
Steqseɣ uḍan
D wid-ak i aɣ-yewḍan
Steqsayeɣ ussan
I aɣ-d-yeǧǧan iɣisan

Steqseɣ amwan
Yessaɣlayen deg wafriwen
Steqseɣ lawan
Yettkellixen imdanen
Steqsaɣ isekla
I d-yemɣin nnig tala
Steqseɣ aman
Nnan-yid : « Yekfa laman »