AZAYLAL

​

Win ur nexdim leḥsab-is
Yefka ul-is i leḥbab-is
Yeḥka-asen tisselbi-s
Ǧǧant yeɣli
Yettwali iruḥ leɛtab-is
Imi ksan aɛerqub-is
Xlan-as akk leǧyub-is
Beddlen tikli

Mi dayen ččan-as tidi-s
Yuɣal rrant akk deg yidis
Ur smeḥsen i tfidi-s
Wa ur t-yettwali
Rnan rẓan aberdi-s
Glan ula s wafud-is
Armi i as-yeɛreq ubrid-is
Yeḥbes tikli

Lukan yeḥric mačči akka
Ad ixemmem i uzekka
Ur yeznuzu taferka
Akken ad izux
Ur yettheggi tafeska
Ur i keččem di tmerka
Yeḥsa zzher-is yerka
Netta ad t-yettbux

Asmi ifaq d yiman-is
Dayen ččan aɛwin-is
Yuɣal yekkat deg yifassen-is
Yeqqar : aḥlil
Yettmuqul tizyiwin-is
Yettwali deg wussan-is
Meskin yecɛel kan allen-is
Am igellil