TENNA-YID

​

Tenna-yid cfiɣ
Ɣef wacu iyi-d-tenniḍ
Asmi akken ttnadiɣ
Abrid i tewwiḍ
Mderkaleɣ ɣliɣ
Sdat-i ur k-id-ufiɣ
Tiyita-nni i ččiɣ
Ziɣ deg-s tettganiḍ

Tenna-yid ɛyiɣ
Ɛyiɣ di tmerja
Ar lebḥer ɣliɣ
Tewwi-yi lmuja
Mi k-id-mmektiɣ
Ttruɣ ur ttufiɣ
Bɣiɣ ad k-waliɣ
Allaɣ-iw iguja

Tenna-id ɣriɣ
Aṭas n yidlisen
Nudeɣ ur ufiɣ
Ayen i yiselben
Awal i k-d-nniɣ
Deg wul teǧǧiɣ
S ijujaḥ-ik rɣiɣ
Rẓen-iyi ifadden

Tenna-id yyaɣ
Yyaɣ ay uzyin
Nekkini qebleɣ
Ad nidir di sin
Aṭas i k-ḥemmleɣ
Ugadeɣ ad selbeɣ
D zzher ttnaɣeɣ
Ur cbiɣ tizyiwin

Tenna-yid : « ayen ? »
D acu i tugadeḍ
Uliɣ asawen
Keččini tsubbeḍ
Fuken imeslayen
Kkawen ifadden
Qqimen-d imeṭṭawen
Imal ad ten-yesfeḍ

Tenna-yid awal
Nekk ur fhimeɣ
Terǧa-yi acḥal
Nekkini ur nudeɣ
Taqqareḍ-d mazal
Yiwwas ad nemlal
Ẓriɣ d lmuḥal
Ẓriɣ ur k-ẓerreɣ

Tanna-d : « smeḥ-iyi
Aṭas i k-ḍeffreɣ »
Ul-iw yenɣa-yi
Mi k-id-mmekteɣ
Tamuɣli-k terḥa-yi
Allaɣ-iw yerwi-yi
Xas ul icewwel-iyi
Yewwi-d ad sebreɣ

Izen aneggaru
Id iyi-d-tura
Ɣriɣ-t s ukukru
Fehmeɣ d tagara
Ziɣ akka ad teḍru
Yekfa usaru
Fiḥel ay iẓri ad nru
Taqsit n tayri-w tefra