WAR AXXAM

 

Walaɣ-t yeṭṭes
Idis n ubrid
Asemmiḍ deg-s iteqqes
Nnda ad t-tessirid
Yenɣa-t usemmiḍ
Yuɣal d azegzaw
Isenned ar lḥiḍ
Iseffeḍ tirtaw

Yeddel ajerbub
Yumes d ilefḍan
Yettel am ujeεbub
Deg ugni n wussan
Aqujjim n uɣrum
Iskef-it s waman
Ma ulac ad yuẓum
Ad yečč imetman

Ur yesεi axxam
Ur yesεi tameṭṭut
Yettidir di ṭṭlam
Am wakken yemmut
Mi yeεya ad iruḥ
Ad ibeddel amkan
Yeεteq kan rruḥ
Yettdeggir deg wussan

Ileḥḥu deg uzal
Ileḥḥu deg yiḍ
Ur yesεi imdukal
Ulac win ara iɣiḍ
Ibubb aqrab-is
Ur as-yezmir
Yekna uzagur-is
Yeɣli ar deffir

Yemmut di targa
Yeɣli ɣef wudem
Anda akken yezga
Yeqqim d ilem
Dayen ifuk leεtab
Yiwen ur t-yettwali
Itri-s dayen iɣab
Di litteε lxali