ANEF-AS

 

Anef-as ad d-yini i as-yehwan
Anef-as ad isuɣ ad d-yini
Anef-as ad d-yeɣḍel igenwan
Kemm, qqim kan d kemmini
Yelha ma tesɛiḍ nniya
Yelha ad tiliḍ d amedya
Anef-as ad isuɣ ad d-yini
Kemm, qqim kan d kemmini

Akka i d netta anef
Anef-as ad yesseɣzef awal
Anef-as xas ad icennef
Ur as-ttak tagnit i ccwal
Yelha ma tettaṭafeḍ imi
Yelha ma terniḍ tasussmi
Anef-as ad yesseɣzef awal
Ur as-ttak tagnit i ccwal

Anef-as ad ttɛeddi zzedwa
Ssber yal ci ad iɛeddi
Akud ad am-d-yewi ddwa
Ad yeḥlu seg uẓar ideddi
Yelha ul-im ma isemmeḥ
Udem-im ad yecmumeḥ
Ssber yal ci ad iɛeddi
Ad yeḥlu seg uẓar ideddi

Yal mi ara teḥres fell-am
Jbed abeḥri i turin-im
Ur tt-rebbi ara di tawla-m
Ur ttcebbil ara uḍan-im
Yelha ma tzemreḍ, saɛef
Ur ttqelliq, ur zeɛɛef
Jbed abeḥri i turin-im
Ur ttcebbil ara ussan-im

Ur tterra ara kan s ul-im
Ma ulac yiwwas ad ifelleq
Tafekka-m ad tuɣal am uclim
Am ucedluḥ ad ttɛelleq
Yelha ma tesɛiḍ leɛqel
Yelha ar sdat muqel
Ma ulac ul-im ad ifelleq
Am ucedluḥ ad iɛelleq

Aqcic-nni yella gar-awen
Yuḥwaǧ baba-s d yemma-s
Yuɛar imi tesɛam yiwen
Anwa ara yilin ar tama-s ?
D netta kan i yettɣaḍen
Ul-ines yezga yuḍen
Yuḥwaǧ baba-s d yemma-s
Yuḥwaǧ ad tilim ar tama-s

Ẓriɣ yuɛer ad teqqimeḍ
Imi d-yerfed afus-is
Ẓriɣ yuɛer ad tessusmeḍ
Imi d-yesseɣzef iles-is
Iban kan akka d tagara
Gar-awen ad tegzem tara
Ɣur-m yerfed-d afus-is
Yerna yesseɣzef-d iles-is

Ma ulac, yid-s fru
Akken ad tethennim di sin
Ttawil aneggaru, d berru
Ma ulac ad d-ḍrunt texnanasin
Yelha, ula d beṭṭu d tifrat
Ur ttxemmim ara ar temrart
Akken ad tethennim di sin
Ur d-ḍerrunt texnanasin