AXXAM N YIMINIG

 

Bniɣ axxam-iw
Beṛṛa n taddart-iw
Ur llin lǧiran
Ur llin imawlan
Nekkini d aɣrib
Ttidireɣ d arbib
Di tmura n medden
Am win ijaḥen

Suliɣ-as lebni
Yewweḍ s igenni
Win i t-iwalan
Ad as-yini : « n flan »
Serseɣ-t ɣef tiɣilt
Rriɣ-as tiseɣlit
Yebna s yidɣaɣen
Ulac win t-izedɣen

Nekk ur ttruḥuɣ
Ur zmireɣ ad lḥuɣ
Ma yella d arraw-iw
Fɣen ddunit-iw
Srafgen merra
Yal wa anda yerra
Yal wa s uxxam-is
Netta d twacult-is

Ay axxam bniɣ
Ala k-ttwaliɣ
Tezgiḍ gar wallen
Am yimeṭṭawen
Tiwwura-k ẓekkrent
Tiɣemmar qecrent
Yuli-k inijjel
Abrid-ik yergel

D axxam n uɣrib
Tuɣaleḍ d axrib
Ala igerfiwen
I ak-yeddawaren
Nekk ass-a uḍneɣ
Ur ttnekkareɣ
Di sbitar ar wayeḍ
Tarwiḥt tettwaweḍ