NEKK  D  WARRAW-IW

 

Nekkini akked mmi
Nekk akked yelli
Yal ass tameddit
Nettheggi tamsirt

Nettheggi tamsirt
Ara ɣren azekka-nni
Yal ass taṣebḥit
Ad ddaklen akken-nni

Ad ddaklen di sin
Ad ruḥen s aɣerbaz
Abrid ad t-awin
Am tninna d lbaz.

Nekkini akked mmi
Nekk akked yelli
Nruḥ s aɣerbaz
Akken ad d-nawwi arraz

Akken ad d-nawi araz
N tagara n useggas
Mmi yewweḍ d argaz
Yessefreḥ baba-s

Akken ad d-nawi araz
N tagara n useggas
Yelli mm-tzuraz
Tessefreḥ baba-s

Acḥal tefreḥ yemma-s
Ifeǧǧeǧ wudem-is
Tettzuxxu yal ass
Tettzuxxu s mmi-s

Acḥal tefreḥ yemma-s
Ifeǧǧeǧ wudem-is
Tettzuxxu yal ass
Tettzuxxu s yelli-s.