IMDUKAL IJERBEN
Winna akken iwumi fkiɣ afud
Yesbedd-iyi ɣef uqenfud
Yebɣa ad iyi-kkes azal
Ar ɣur-i yeddem-d aseffud
Deffir udrim yettazal
Ass kamel netta yesferfud
Yuɣal am win iselben
Mmektaɣ-ken-id ay iḥbiben
A wid ijerben
Sneɣ imdanen ččan tidi-w
Bɣan ad rẓen afud-iw
Akken ad ilin kan d nutni
ɣilen rekben aɛudiw
ɣilen dayen wwḍen s igenni
Nekk ktaleɣ-ten s wammud-iw
Ufiɣ-d aṭas i ten-iɣelben
Sslet-iyi-d ay iḥbiben
A wid ijerben
Fkiɣ ayen sɛiɣ i medden
ɣileɣ ad iyi-budden
Rriɣ-ten akk d iḥbiben
ɣef uqenfud iyi-sbedden
Am tata ttneqlaben
Kra bniɣ bɣan ad t-hudden
Amzun yella i ikesben
Tecfam fell-i ay iḥbiben
A wid ijerben
A wid yesnen taqsiṭ-iw
Tellam d tiṭ-iw
I wiyaḍ wis ma fehmen ?
Ur qedceɣ ɣef tɛebbuḍt-iw
Ur ttazzaleɣ deffir yedrimen
Teẓeram teffareɣ imeṭṭi-w
Ttidireɣ am nekk, am yeɣriben
Mmektaɣ-ken-id ay iḥbiben
A wid ijerben
Sɛiɣ amdakel n tidet
Ur k-ixeddeɛ, ur k-itett
Ma txusseḍ ad k-iɛiwen
Ur ak-yettandi taqfet
Ur k-yettaǧa deg wusawen
Ma teɣliḍ ak-d-yefk tayet
Xas telliḍ seg wid iɛaben
Ssawaleɣ-awenin ay iḥbiben
A wid ijerben
Lḥiɣ d yergazen acḥal
Ur iyi-ǧǧin d lmuḥal
Sendeɣ ɣef tuyat-nsen
Akken yebɣu yili lḥal
Lḥiɣ s tafat-nsen
Tajmilt i mmi-s imessuḥal
D wid akk yenɛettaben
Tajmilt-nwen ay iḥbiben
A wid ijerben
Sɛiɣ imdukal bedden
Ttarran-iyi-d ifadden
Yal mi ara d-yerzu layas
Anda tefsi ad ttcudden
Yal wa iqeddec s nniya-s
Ma teɣliḍ ad k-sbedden
Ma ur tezmireḍ ak-bibben
Semḥet-iyi ay iḥbiben
A wid ijerben
Sɛiɣ imdukal d irgazen
Awal-nsen yewzen
Snen ad s ɣerblen awal
Snen, yerna ttmeyyizen
Ur zeggiren ara ar ccwal
I tidet kan i ttanzen
Ur ssinen ara ad skidben
Erret-d awal iḥbiben
A wid ijerben
Sɛiɣ imdukal d izmawen
Sɛan ismawen
Fkan aṭas, aṭas i yedles
Deg wasmi mmlalen wulawen
Warǧin d-yecciḍ yiles
Nebges nesqaṭṭeɛ i yeɛdawen
Akken ur aɣ-d-ttqerriben
Erret-d awal ay iḥbiben
A wid ijerben
Sɛiɣ imdukal d lwiz
Awal-nsen ɛziz
Ufiɣ-ten di tegnit n ddiq
Sked aɛerqub ur nekriz
Fell-aɣ iṭij yeddeqdiq
Sked urti ur nebriz
Yerna ur nečči iḥbuben
Ssawleɣ-awenin ay iḥbiben
A wid ijerben