FKAN-AM ISEM

 

Fkan-am isem

Ur am-fkin udem

Kksen-am asirem

Iḍelli d wass-a

 

Ḥejben-am udem

Nnan-am sussem

Allaɣ-im d ilem

Tcubaḍ taɣawsa

 

Seg zik ar ass-a

Akka i d nettat

Deg wasmi d-tebda talsa

Tettlal-d tettmettat

Seg zik ar ass-a

Deg wasmi d-tebda talsa

Tafat-is tensa

Ifeṭṭiwej ur t-walat

 

Tecbeḥ i tmuɣli

Tjebbed allen

Rẓaget d ilili

I wid i as-isellen

Tecbeḥ i tmuɣli

Rẓaget d ilili

Anda-tt tlelli ?

A tid i d-yettlalen

 

Teddem tagersa

Teffeɣ ad tekrez

Tejmeɛ taɣewsa

Tessen ad teḥrez

Teddem tagersa

Tejmeɛ taɣewsa

Teḥrez tilisa

Xas ma tettwaqrez

 

Tesseker-d izem

Ar ɣur-s tessarem

Ass-a ad tt-itezzem

Igzem-as tasa

 

Ayen i as-tessersem

U yerna tesber

Tesswem-as ssem

Yiwen ur as-iḥebber

 Ayen i as-tessersem

Tesswem-as ssem

Tesber tessusem

Teggugem teqber