YID DDUNIT

 

Ddunit mačči d taḍsa

Tesɛa daɣen uguren

Yal wa amek i t-teksa

Tenher-aɣ am yizamaren

Yiwen tudert-is tefsa

Am yiḍelli, am wass-a

S leḥrir i as-d-tessa

Yella seg wid yettidiren

Wayeḍ tegzem-as tasa

Tekkes-as ula d iselsa

I usemmiḍ i yensa

Anda yuzzel ad t-zwiren

 

Ddunit-agi  akka

Wa yefka-as, wa tekkes-as

Wa thegga-as aẓekka

Wa tqeɛɛed-as lsas

Yiwen tezwi-as takka

S lufa i as-tefka

Ar lxir isenned itekka

Tezga fell-as d aɛessas

Wayeḍ d aṭṭan i as-tefka

A teqqaz deg-s twekka

Ala as-ihemmej tafekka

Yečča lqut d amessas

 

D acu i ak-d-yeqqimen a zzman

Anagar takerḍa d lexdeɛ

Nettidir gar izerman

Win i ak-iweɛɛan ad k-yessebleɛ

Ddunit-a nehren-tt waman

Ur d-yeqqim deg-s laman

Idammen n medden  ḥman

Awal sin, ad jebden ddreɛ

Nelmed tayerza ileɣman

Xerben-aɣ akk wulman

Neclex-d akk igeḍman

Deg wayen n diri nzerreɛ

 

Neggra-d di lweqt aɣeddar

Imdukal-ik ad k-ɛerrin

D win ara ak-yekksen leqder

Ara k-d-yettaken timsirin

Win tɣileḍ ad k-yejber

Ma teɣliḍ ad k-iḥebber

Ad k-yesseḥnunef deg uɣebber

Ad k-yečč akk tigedrin

Yid-s yal ass d amɛebber

Ad teṛwuḍ yid-s amɛezber

S yir awal ad k-yeqber

Ad yernu, ad d-yessufeɣ tidmarin

 

Tbeddel lɛeqliya

Yal ci yuɣal d idrimen

Win yesɛan nniya

Di tsusmi yettru idammen

Ddunit-agi dayen teɛya

Amdan yuɣal d ssɛaya

Ur d-teqqim laɛnaya

Mcebbalen akk yixxamen

Ur aɣ-tenfiɛ leqraya

Ur aɣ-d-ḥeggu lemziyya

Nettwali ula di dderya

Gar-asen ttemyasamen