Izen yeffer wakal

​

d ungal wis sin n umaru  Fahim Messaoudene, yeffeɣ-d deg ctamber 2023 ɣer teẓrigin Ccix Muḥend Ulḥusin.

Uqbel akk ad nɣer ad ungal ad d-nefk asteqsi: Wissen d acu-t yizen i yeffer wakal deg wungal-a?

 

Ilmend n tedyant n wungal ad nfiq d acu-t yizen-a i yeffer wakal. D tira. Deg wungal yella uwadem isem-is Tira. D taqcict. Yenɣa-tt yiwen n yilemẓi n taddart-is ; netta iḥemmel-itt, nettat tugi-t. Yenɣa-tt, yemḍel-itt ddaw n wakal. Seg yimir-nni, imezdaɣ shan Tira.

Anir (awadem agejdan n wungal), yal ass isell i ṣṣut n Tira tessawal-as-d. Yiwen n wass, yuli yiziɣer-is ɣer wanda ttnejmaεen wat Laxeṛt, dinna iwala-d Tira. Nettat (Tira), temla-yas-d tadyant-is d wayen ilaqen fell-as ad t-yexdem: ilaq ad d-yessekfel tadyant n Tira, akken ad d-tbin tidet. D aya i yexdem Anir mi d-yuɣal ɣer tudert: yessekfel-d tadyant n Tira, yesban-d anwa i tt-yenɣan. S wakka i tekfa tedyant n wungal.

​

Mi ara nmuqel ɣer waya, yal imeɣri amek ara yefhem izen-a. Hatan wamek i t-fehmeɣ nekk:

 

– Izen yeffer wakal.

– Tira temḍel ddaw n tmurt.

 

Snat n tefyar mmalent-d tira yeffer-itt wakal – dayi ad d-nemmeslay ɣef tira, mačči ɣer uwadem.

Akal (tamurt), aṭas n yismawen i yeddem. Lemmer ad nmuqel ɣer tesmidegt (toponymie) ad d-naf acḥal n wawalen (ismawen) i yeffer wakal. Γef waya yuwi-d ad nani deg tmurt (akal) ɣef tutlayt/tira. Wissen ma d izen-a i yebɣa ad yessiweḍ umaru Fahim Messaoudene : Tira, tutlayt… attan deg wakal!

 

Yella daɣen yizen-nniḍen i yebɣa ad yessiweḍ umaru, wayi d tira. Yebɣa ad d-yini ilaq ad naru. Deg waṭas n tedyanin ameskar ibedder-d awal : Tira, deg usebter 117, yenna-d:  » Yumen belli ayen akk i as-d-tenna Tira yella s tidet. », dayi ad nefhem: s tira ara neḥrez tidet.

​

Aɣbalu